28-30 шілдеде Калининград облысының Сокольники ауылында агроөнеркәсіп кешеніндегі маңызды оқиғалардың бірі – «Бүкілресейлік егіс күні – 2022» көрмесі өтеді, деп хабарлайды ҚазАқпарат. Ресей Ауыл шаруашылығы министрлігінің баспасөз қызметі.
Дәстүр бойынша көрме қонақтарына ең заманауи ауыл шаруашылығы техникалары мен жабдықтары, селекция, агрохимия және өсімдіктерді қорғау саласындағы соңғы жаңалықтар ұсынылады. Бұл ретте саланың жетістіктерін нақты дала жағдайында бағалау мүмкін болады – кең ауқымды ашық аспан астындағы кешенге тәжірибелік алқаптар, демонстрациялық учаскелер және жабдықтарға арналған полигондар кіреді.
Көрме 37 гектар аумақты алып жатыр, оның шамамен 1 гектары Калининград облысында өсірілген жаздық дақылдарға арналған. Мұнда бидай, арпа, сұлы, қарақұмық, жүгері, соя, рапс және басқа да дақылдардың 64 сорты мен будандары қойылады.
Іскерлік бағдарлама аясында сарапшылар мен нарық қатысушылары еліміздегі өсімдік шаруашылығын дамытудың басым бағыттарын талқылайды. Орталық шара Ауыл шаруашылығы министрі Дмитрий Патрушевтің төрағалығымен саланың 2022-2030 жылдарға арналған стратегиялық бағдарлары мен оларға қол жеткізу құралдарына арналған пленарлық отырыс болмақ. Трансляция Ресей Ауыл шаруашылығы министрлігінің сайтында қолжетімді болады.
Сонымен қатар, егін шаруашылығының тиімділігін арттыру, астық, пестицидтер мен агрохимикаттарды қадағалау жүйелерінің жұмысы, отандық тұқым шаруашылығын дамыту, органикалық егін шаруашылығы, мелиоративтік кешен және басқа да өзекті тақырыптар талқыланады.