Астрахан облысының губернаторы Игорь Бабушкин мен «Агро Яр» жауапкершілігі шектеулі серіктестігінің бас директоры Антон Мингазов Астрахань облысының Чернояр ауданында картоп пен астық өсіру жөніндегі инвестициялық жобаны жүзеге асыру туралы келісімге қол қойды. Құжатқа ХХV Санкт-Петербург халықаралық экономикалық форумы аясында қол қойылды. Бұл туралы аймақ басшысының баспасөз қызметі хабарлады.
Жобаны іске асыру мерзімі 2022-2027 жылдар. Жоба бойынша жыл сайын 150 мың тонна картоп және 50 мың тонна дәнді дақылдар өсіру көзделген. Пайдаланылмаған 12 мың гектарға жуық ауыл шаруашылығы жерлері айналымға енгізіліп, сыйымдылығы 135 мың тонна қоймалар салынады. Жалпы инвестиция көлемі 6 миллиард рубльді құрайды. 100 жаңа жұмыс орны ашылады.
Заманауи агротехнологиялар арқылы картоп пен дәнді дақылдардың өнімділігі жоғары сорттары өсірілетін болады. Өсірілген картоп ірі чипсы және фастфуд өндірушілеріне әрі қарай өңдеуге жіберіледі, сондай-ақ федералды сауда желілеріне жеткізіледі.