Астраханьдық диқандар көктемгі дала жұмыстарына толық дайын, деп хабарлады 1 наурызда облыстың Ауыл және балық шаруашылығы министрі Руслан Пашаев Instagram желісіндегі ресми парақшасында.
«Ұйымдастырылған секторда 2022 жылға арналған ауыл шаруашылығы дақылдарының егіс алқаптары болжамы өткен жылмен салыстырғанда 90 пайызға артып, 105 мың гектарды құрайды. Көктемгі дала жұмыстарына дайындық әдеттегідей жүріп жатыр, шаруалар барлық қажетті материалдық-техникалық ресурстармен қамтамасыз етілген», - деп жазды Пашаев.
Ол қазіргі таңда облыс диқандары ерте бақша дақылдарының көшеттерін дайындап жатқанын, облыстың кейбір аудандарында ерте бақша дақылдарының көшеттерін жылыжайларға егу жұмыстарын бастағанын түсіндірді.
«Облыс бойынша тұқым және көшет материалдарымен қамтамасыз ету 85 пайызды құраса, қалған көлемге келісім-шарт жасалып, жақын арада жеткізілетін болады. Ерте картоп егу үшін 5,5 мың гектар (14 мың тонна) алқапқа тұқымдық материал дайындалды, ол қазір өніп жатыр», - деп толықтырды министр.
Оның айтуынша, минералды тыңайтқыштарды сатып алу кестеге сай жүргізілуде: минералды тыңайтқыштар көлемін өткен жылмен салыстырғанда 140 пайызға арттыру жоспарлануда.